ਗ਼ਜ਼ਲ

ਮੋਤ ਨਾਲੋਂ ਵੀ ਭੈੜਾ ਹੁੰਦਾ ,ਦਰਦ ਜੁਦਾਈਆਂ ਦਾ ,

ਕੀ ਪੁਛਦੇ ਹੋ ਸਾਡਾ ਮੰਦਾ ,ਹਾਲ ਸੁਦਾਈਆਂ ਦਾ .

ਥਾਨੇਦਾਰ ਦੀ ਮੁੱਠੀ ਪਹਿਲਾਂ,ਕਰ ਦਿਓ ਗਰਮ ਤੁਸੀਂ,

ਡਰ ਨਈ ਰਹਿੰਦਾ ਫੇਰ, ਚੋੱਕ ਵਿਚ ਖੜੇ ਸਿਪਾਹੀਆਂ ਦਾ.

ਸਰਕਾਰੀ ਨੋਕਰ ਹਾਂ ਜੀ ,ਪੇਮੇਂਟ ਗੋਰ੍ਮੇੰਟ ਨੇ ਕਰਨੀ ,

ਡੂਹਡਾ ਬਿਲ ਬਣਾਓ ਮਾਲਕੋ ,ਇੰਨਾ ਦਵਾਈਆਂ ਦਾ.

ਜੇ ਤੂੰ ਹੀ ਖਾਹਿਸ਼ ਰੱਖੀ,  ਦਿਲ ਵਿਚ ਰੁੱਤ ਬਸੰਤੀ ਦੀ ,

ਕਰੂ ਸਵਾਗਤ ਫੇਰ ਕੋਣ ਦੱਸ ,ਰੁੱਤਾਂ ਅਣਚਾਹੀਆਂ ਦਾ.

ਮਸਤੀ ਦੇ ਵਿਚ ਰਹਿਣਾ ਸਿਖ ਲੈ ,ਤੂੰ ਹਰਵਿੰਦਰ ਸਿੰਘਾ ,

ਨੋਟਿਸ ਲੈਣਾ ਛਡ ਪਰਾਂ, ਹੁਣ ਬੇ-ਵਫਾਈਆਂ ਦਾ.

ਗੀਤ-ਕੁਝ ਤਾਂ ਬੋਲ ਮਹਿਰਮਾ ਵੇ

ਜੇਠ ਹਾੜ ਦੀਆਂ ਧੁਪਾਂ ,ਛਤਰੀ ਖੋਲ ਮਹਿਰਮਾ ਵੇ ,

ਚੁੱਪ ਚੁੱਪ ਕਾਹਤੋਂ ਰਹਿਨਾਂ ,ਕੁਝ ਤਾਂ ਬੋਲ ਮਹਿਰਮਾ ਵੇ -

ਕਰਜਾ ਲੈ ਕੇ ਸੰਦ  ਬਨਾਏ , ਧੰਦਾ  ਵਾਹੀ  ਦਾ ,

ਮੈਨੂ ਪਤਾ ਨਈ ਮੁੜਿਆ ਹੋਣਾ,ਵਿਆਜ ਛਿਮਾਹੀ ਦਾ,

ਅੰਨਦਾਤੇ ਦੀ ਜੇਬ ਹੈ ਖਾਲੀ, ਪੈਂਦੇ ਹ਼ੋਲ ਮਹਿਰਮਾ ਵੇ,

ਚੁੱਪ ਚੁੱਪ ਕਾਹਤੋਂ ਰਹਿਨਾਂ ,ਕੁਝ ਤਾਂ ਬੋਲ ਮਹਿਰਮਾ ਵੇ -

ਮਾਂ ਮੰਜੇ ਵਿਚ ਪਈ ਚੂਕਦੀ,ਮੰਦਾ ਹਾਲ ਵਿਚਾਰੀ ਦਾ,

ਪੈਸਿਆਂ ਬਾਝੋਂ ਇਲਾਜ ਨੀ ਹੋਇਆ ,ਮਮਤਾ ਮਾਰੀ ਦਾ ,

ਬੇਬੱਸ ਹੋਏ ਬੈਠੇ ਰਹੀਏ,ਓਦੇ ਕੋਲ ਮਹਿਰਮਾ ਵੇ,

ਚੁੱਪ ਚੁੱਪ ਕਾਹਤੋਂ ਰਹਿਨਾਂ ,ਕੁਝ ਤਾਂ ਬੋਲ ਮਹਿਰਮਾ ਵੇ -

ਵਧਦੀ ਨੂੰ ਕੀ ਚਿਰ ਲਗਦਾ ਏ ,ਧੀ  ਧਿਆਣੀ  ਨੂੰ ,

ਕਿੰਨਾ ਚਿਰ ਘਰ ਹੋਰ ਰਖਾਂਗੇ,  ਲਾਡੋ  ਰਾਣੀ  ਨੂੰ ,

ਬਾਬਤ ਓਦੀ,ਸੋਨੇ ਵਰਗਾ ,ਵਰ ਟੋਲ ਮਹਿਰਮਾ ਵੇ,

ਚੁੱਪ ਚੁੱਪ ਕਾਹਤੋਂ ਰਹਿਨਾਂ ,ਕੁਝ ਤਾਂ ਬੋਲ ਮਹਿਰਮਾ ਵੇ -

ਖੁਦਕਸ਼ੀਆਂ ਦੀਆਂ ਖਬਰਾਂ ਪੜਕੇ ,ਮਨ ਨੂੰ ਚੈਨ ਨਾ ਆਵੇ ,

ਹਰਵਿੰਦਰ ਜੱਟ ਦੀ ਜੂਨ ਬੁਰੀ, ਰੱਬ ਇਹ ਜੂਨ ਨਾ ਪਾਵੇ,

ਦਿਲ ਦੇ ਦੁਖ ਸੁਖ ਮੇਰੇ ਕੋਲੇ ,ਅੱਜ ਤੂੰ  ਫੋਲ ਮਹਿਰਮਾ ਵੇ ,

ਚੁੱਪ ਚੁੱਪ ਕਾਹਤੋਂ ਰਹਿਨਾਂ ,ਕੁਝ ਤਾਂ ਬੋਲ ਮਹਿਰਮਾ ਵੇ -.............ਹਰਵਿੰਦਰ ਧਾਲੀਵਾਲ

ਗ਼ਜ਼ਲ -ਸਮਰਪਿਤ ਪਰਮ ਸੰਤ ਬਾਬਾ ਰਾਮ ਸਿੰਘ ਜੀ

 ਆਪਣੇ ਦੁੱਖ ਲਈ ਰੋਣਾ ਯਾਰੋ ,ਇਹ ਕਿਥੋ ਦੀ ਸਿਆਣਪ ਹੈ ,

 ਦੁੱਖ ਪਰਾਏ ਰੋਈਏ ਜੇਕਰ ,ਬਣ ਜਾਏ ਫੇਰ ਇਬਾਦਤ ਹੈ .

ਤੈ ਕੀ ਦਰਦ ਨਾ ਆਇਆ ਰੱਬਾ ,ਦੁਨੀਆ ਪਈ ਕੁਰਲਾਵੇ ,

ਆਓ ਓਹਨੂ ਨਿਹੋਰੇ ਦੇਈਏ, ਉਹ ਦੁਨੀਆ ਦਾ ਮਾਲਿਕ ਹੈ .

ਇਕੋ ਦਰ ਦਾ ਮੰਗਤਾ ਬਣ ਜਾ ,ਪੈ ਜਾਊ ਤੈਨੂ ਖੈਰ ਕਦੇ ,

ਦੋ ਬੇੜੀਆਂ ਵਿਚ ਪੈਰ ਨਾ ਧਰੀਏ, ਸਿਆਨਿਆ ਦੀ ਕਹਾਵਤ ਹੈ .

ਸੇਵਾਦਾਰੋ ਵੇ ਸਰਦਾਰੋ , ਅੱਜ ਮੈ ਤੱਤੜੀ ਨੂੰ ਰੋਕਿਓ ਨਾ ,

ਰੱਜ ਰੱਜ ਉਸਦੇ ਦਰਸ਼ਨ ਕਰਲਾਂ ,ਮੇਰੇ ਦਿਲ ਦੀ ਚਾਹਤ ਹੈ .

ਉਹ ਤਾਂ ਰਹਿਮਤ ਯਾਰ ਓਹਦੇ ਦੀ ,ਗਲ ਨਾਲ ਲਾਈ ਬੈਠਾ ਹੈ .

ਹਰਵਿੰਦਰ ਐਵੇਂ ਸ਼ੱਕਾਂ ਕਰਦੈ, ਉਹ ਕਿਧਰ੍ਲਾ ਆਸ਼ਕ ਹੈ ..................ਹਰਵਿੰਦਰ ਧਾਲੀਵਾਲ .

ਗ਼ਜ਼ਲ

 ਖਬਰਦਾਰ ਹੋਸਿਆਰ ਅਗੇ ਆਪਣਿਆ ਦੀ ਬਸਤੀ ਏ ,
  ਆਪਣਿਆ ਤੋ ਬਚ ਜਾਵੀਂ ,ਗੈਰਾਂ ਦੀ ਕੀ ਹਸਤੀ ਏ .

ਦਸਾਂ ਨੋਹਾਂ ਦੀ ਕਿਰਤ ਛੱਡ ਕੇ ਹੋ ਜਾ ਠੱਗੀਆਂ ਮਾਰਨ ਤੇ ,

ਜੇ ਤੂੰ ਸਜਣਾ ਦੁਨੀਆ ਉਤੇ, ਚਾਹੁਨਾ ਸੋਹਰਤ ਸਸਤੀ ਏ .

ਮਾੜੇ ਬੰਦੇ ਦੀ ਇਕੋ ਘੁਰਕੀ ,ਫੂਕ ਅਸਾਂ ਦੀ ਕਢ ਦਿੱਤੀ ,

ਮਰ ਜਾਣਾ ਮੈ ਤੇਰੇ ਨਾਂ ਦੀ ,ਜੇਬ ਚ ਪਾ ਕੇ ਪਰਚੀ ਏ,

ਇਕ ਦੂਜੇ ਦੀ ਖੁਸ਼ੀ ਵੇਖ ਕੇ,ਲੋਕੀ ਸੜ-ਬਲ  ਜਾਂਦੇ ਨੇ ,

ਘੋਰ ਸਵਾਰਥ ਪਾਲੀ ਬੈਠੀ, ਤਾਹਿਓਂ ਦੁਨੀਆ ਗਰਕੀ ਏ .

ਚੋਰ ਅਖ ਨਾਲ ਵੇਖੇ ਉਹ ਹੁਸਨ ਦੀਆਂ ਸਰਕਾਰਾਂ ਨੂੰ ,

ਉਪਰੋਂ ਭੋਲਾ ਭਾਲਾ ਬਣਦਾ,ਵਿਚੋਂ ਪੂਰਾ ਠਰਕੀ ਏ ,

ਫੋਨ ਹਰਵਿੰਦਰ ਚੁਕਦਾ ਨਾਂਹੀ ,ਤੇ ਨਾ ਹੀ  ਉਹ ਹਰਕਾਰਾ ,

ਦਰਦੇ-ਦਿਲ ਰੁੱਕੇ ਵਿਚ ਲਿਖ ਕੇ ,ਜਿਦੇ ਹਥ ਭੇਜਿਆ ਦਸਤੀ ਏ ........ਹਰਵਿੰਦਰ ਧਾਲੀਵਾਲ .

ਗੀਤ -ਬਾਬਿਆਂ ਨਾ ਤਾਸ਼ ਖੇਡ ਕੇ .

ਕੁੜੀ- ਸੰਗ ਦਸਦੀ ਨੂੰ ਲੱਗੇ ਆਖਾਂ ਕੀ ਵੇ ,
         ਮੇਰਾ ਲੱਗੇ ਨਾ ਕੱਲੀ ਦਾ ਘਰੇ ਜੀਅ ਵੇ ,
         ਉਤੋਂ ਮਾਂ ਤੇਰੀ ਬੈਠ ਜਾਂਦੀ ਲੜ ਕੇ ਵੇ -

          ਅਧੀ ਰਾਤੀਂ ਘਰ ਆਵੇਂ ਤੂੰ ....

         ਮੈਨੂ ਉਠਣਾ ਪੈਂਦਾ ਏ ਵਡੇ ਤੜਕੇ ਵੇ ...

ਮੁੰਡਾ- ਸਿਰੋੰ ਲਾਹ ਕੇ ਮੜਾਸਾ ਕੇ ਦੇਈਦੇ ਕਛ ਚ ,

         ਜਾ  ਬੈਠੀਦਾ ਏ ਆਥਣੇ  ਜੇ  ਸਥ  ਚ ,

         ਫੇਰ ਰਹਿੰਦਾ ਨਾ ਯਾਦ ਘਰ ਬਲੀਏ ਨੀ ,

         ਬਾਬਿਆਂ ਨਾ ਤਾਸ਼ ਖੇਡ ਕੇ ......

         ਹੋ ਜਾਂਦਾ ਏ ਮਗਜ਼ ਤਰ ਬਲੀਏ ਨੀ ....

ਕੁੜੀ- ਵੇ ਮੈਂ ਉਠ ਕੇ ਸਵੇਰੇ ਦੁਧ ਰਿੜਕਾਂ,

         ਕੰਮ ਕਰਦੀ ਨੂੰ ਤੇਰੀਆਂ ਹੀ ਬਿੜਕਾਂ ,

         ਫੇਰ ਬੈਠ ਜਾਂਦੀ ਕਾਲਜੇ ਨੂੰ ਫੜ ਕੇ ਵੇ ..

         ਅਧੀ ਰਾਤੀਂ ਘਰ ਆਵੇਂ ਤੂੰ ....

         ਮੈਨੂ ਉਠਣਾ ਪੈਂਦਾ ਏ ਵਡੇ ਤੜਕੇ ਵੇ ...

ਮੁੰਡਾ- ਖਾਕੇ ਹਾਜਰੀ ਖੇਤਾਂ ਨੂੰ ਜਾਈਏ ਭੱਜ ਨੀ ,

         ਸਾਡਾ ਖੇਤਾਂ ਵਿਚ ਵਸਦਾ ਏ ਰੱਬ ਨੀ ,

         ਘਰ ਬੈਠ ਕੇ ਜਾਣਾ ਨੀ ਸਰ ਬਲੀਏ ਨੀ ,

         ਬਾਬਿਆਂ ਨਾ ਤਾਸ਼ ਖੇਡ ਕੇ ......

         ਹੋ ਜਾਂਦਾ ਏ ਮਗਜ਼ ਤਰ ਬਲੀਏ ਨੀ ....

ਕੁੜੀ-  ਮੇਰਾ ਤੱਤੜੀ ਦਾ ਜੀਅ ਪ੍ਰਚਾਉਗਾ ,

         ਵੇ ਜਦੋਂ ਨਿੱਕਾ ਜਿਹਾ ਜੀਅ ਘਰ ਆਉਗਾ ,

         ਮੇਰੀ ਕੁਖ ਵਿਚ ਗੰਢ ਜੇਹੀ ਰੜਕੇ ਵੇ ,  

         ਅਧੀ ਰਾਤੀਂ ਘਰ ਆਵੇਂ ਤੂੰ ....

        

          ਮੈਨੂ ਉਠਣਾ ਪੈਂਦਾ ਏ ਵਡੇ ਤੜਕੇ ਵੇ ...

ਮੁੰਡਾ-  ਹਰਵਿੰਦਰ ਨਾ ਹੋਊ ਤੇਥੋਂ ਵਖ ਨੀ ,

          ਮੈਨੂ ਛੇਤੀ ਛੇਤੀ ਹਿਸਾਬ ਲਾਕੇ ਦੱਸ ਨੀ ,

         ਕਦੋਂ ਹੋਊਗਾ ਕਿਲਾ ਸ੍ਰ੍ਰ ਬਲੀਏ ਨੀ ,

         ਬਾਬਿਆਂ ਨਾ ਤਾਸ਼ ਖੇਡ ਕੇ ......

        ਹੋ ਜਾਂਦਾ ਏ ਮਗਜ਼ ਤਰ ਬਲੀਏ ਨੀ ..................ਹਰਵਿੰਦਰ ਧਾਲੀਵਾਲ

ਗ਼ਜ਼ਲ

ਮਾੜੇ ਬੋਲ ਬੇਗਾਨਿਆ ਦੇ ,ਦਿਲ ਅਸਾਂ ਦਾ ਸਹ ਜਾਂਦੈ.

ਅਪਣਿਆ ਦਾ ਚੁਪ ਰਹਿਣਾ ਵੀ ,ਛੁਰੀਆਂ ਵਾਂਗੂ ਲਿਹ ਜਾਂਦੈ.

ਸਤਕਾਰ ਕਿਸੇ ਦਾ ਰੱਬ ਦੇ ਵਾਂਗੂ ,ਜੇਕਰ ਕਰ ਲਈਏ,

ਭੁਲ ਤਹਜੀਬਾ,ਬੰਦਾ ਖੁਦ ਨੂੰ ,ਰੱਬ ਸਮਝ ਕੇ ਬਿਹ ਜਾਂਦੈ.

ਸੱਚੇ ਦਾ ਅਪਮਾਨ ਕਰੋ ਤੇ ,ਮਾੜੇ ਦਾ ਗੁਣਗਾਨ ਕਰੋ ,

ਜੀਹਦੇ ਕੋਲੇ ਇਹ ਗੁਣ ਨੇ ਉਹੀ ਬਾਜ਼ੀ ਲੈ ਜਾਂਦੈ.

ਅਜਬ ਹੀ ਗੋਰਖ ਧੰਦਾ ਹੈ ਇਹ ਬਾਜ਼ੀ ਇਸ਼ਕੇ ਦੀ ,

ਜਰਬ ਤ੍ਕ੍ਸ਼ੀਮਾ ਕਰ ਵੇਖਿਆ ਪੱਲੇ ਕੁਝ ਨਾ ਰਿਹ ਜਾਂਦੈ.

ਮਾੜਾ ਬੰਦਾ ਗੁੱਸਾ ਨੱਕ ਤੇ, ਸਦਾ ਟਿਕਾਈ ਰੱਖਦਾ ਏ ,

ਬਚ ਜਾਈ ਹਰਵਿੰਦਰ ਕੋਲੋ ,ਛੇਤੀ ਗਲ ਨੂੰ ਪੈ ਜਾਂਦੈ............ਹਰਵਿੰਦਰ ਧਾਲੀਵਾਲ

ਗ਼ਜ਼ਲ

ਦੁੱਖ  ਦਸੀਏ  ਕੀਕਣ  ਹੋਰਾਂ   ਨੂੰ ,

ਕਿਵੇ ਗਲ ਨਾਲ ਲਾਈਏ ਥੋਹਰਾਂ ਨੂੰ ,

ਕਦੇ ਸਾਡੇ ਵਿਹੜੇ ਵੀ ਆਵਣ,

ਕੋਈ ਆਖੋ ਜਾ ਗੁਲਮੋਹਰਾਂ ਨੂੰ .

ਝਾਉਲਾ ਜਿਹਾ ਪੈਂਦਾ  ਸੱਜਣਾ ਦਾ ,

ਅਸੀਂ ਦੂਰੋ ਪਛਾਨੀਏ ਤੋਰਾਂ ਨੂੰ .

ਉਹ ਮਿਲ ਕੇ ਮੈਚ ਨੂ ਖੇਡ ਗਏ,

ਅਸੀਂ ਗਿਣਦੇ ਰਹੇ ਸਕੋਰਾਂ ਨੂੰ .

ਜਿੱਤਾਂ ਤੇ ਹਾਰਾਂ ਭਾਰੂ ਨੇ ,

ਦੱਸ ਕਿੰਝ ਅਜਮਾਈਏ ਜੋਰਾਂ ਨੂੰ ,

ਹੱਕ ਦੇਈਏ ਜਿੰਦਗੀ ਦਾ ਕਿਸ ਨੂੰ

ਹਰਵਿੰਦਰ ਨੂੰ ਜਾਂ ਹੋਰਾਂ ਨੂੰ .............................ਹਰਵਿੰਦਰ ਧਾਲੀਵਾਲ

ਧੀਆਂ ---- ਹਰਵਿੰਦਰ ਧਾਲੀਵਾਲ

ਪੁਤਰਾਂ ਨੂ ਨੈਣਾ ਚ ਵਾਸੋਉਣ ਵਾਲਿਆ ,ਧੀਆਂ ਦੀ ਵੀ ਸਾਰ ਕਿਤੇ ਲੈ ਬਾਬਲਾ

ਧੀਆਂ ਨੂ ਬੁਲਾਵੇਂ ਕਹਿ ਕੇ ਮਰ ਜਾਣੀਆ,ਜਿਓਣ ਜੋਗੀਆਂ ਵੀ ਕਿਤੇ ਕਿਹ ਬਾਬਲਾ .

ਨਾਨਕ ਦੀ ਦੁਨੀਆਂ ਦੇ ਸੁਨ ਬੰਦਿਆ ,ਜਗ -ਜਨਣੀ ਨੂੰ ਹੋਰ ਤੜਫਾਵੀ  ਨਾ ,

ਜਗ ਵੇਖਣੇ ਦੀ ਤਾਂਘ ਦਿਲ ਵਿਚ ਹੈ ,ਕੁਖ ਵਿਚ ਮੈਨੂ ਕੱਤਲ ਕਰਾਵੀ ਨਾ ,

ਔਰਤ ਦੇ ਬਿਨਾ ਜੱਗ  ਚੱਲਣਾ  ਨਹੀ ,ਕੁਦਰਤ ਕੀਤਾ ਇਹ ਤੈਅ ਬਾਬਲਾ..

ਧੀਆਂ ਨੂ ਬੁਲਾਵੇਂ ਕਹਿ ਕੇ ਮਰ ਜਾਣੀਆ,ਜਿਓਣ ਜੋਗੀਆਂ ਵੀ ਕਿਤੇ ਕਹਿ ਬਾਬਲਾ .....

ਖੇਡਾਂ ਕੀ ਪੜਾਈਆਂ ਪੇਹਲੀਆਂ ਪੁਜੀਸਨਾ ,ਕੁੜੀਆਂ ਨੇ ਬਾਜ਼ੀ ਹਰ ਥਾਂ ਮਾਰੀ ਏ ,ਪੈਰ ਦੀ ਜੁੱਤੀ ਨੀ ਹੁਣ ਬਨੰਨਾ ਅਸੀਂ ,ਨਵਾ ਏ ਜਮਾਨਾ ਹੁਣ ਸਾਡੀ ਵਾਰੀ ਏ ,

ਮਿਹਨਤਾਂ ਦੇ ਮੁਲ ਸਦਾ ਪੈਣ ਜਗ ਤੇ ,ਵਸ ਵਿਚ ਹੋਈ ਹਰ ਸੈਅ ਬਾਬਲਾ ,

ਧੀਆਂ ਨੂ ਬੁਲਾਵੇਂ ਕਹਿ ਕੇ ਮਰ ਜਾਣੀਆ,ਜਿਓਣ ਜੋਗੀਆਂ ਵੀ ਕਿਤੇ ਕਿਹ ਬਾਬਲਾ ...

ਪੁੱਤਾਂ ਨਾਲੋਂ  ਵਧ ਤੈਨੂ ਦੇਉਂ ਸੁਖ ਮੈ ,ਲਾਜ਼ ਵਾਲਾ ਪੱਲਾ ਨਹੀ ਕਿਲੇ ਟੰਗਦੀ .

ਜੁਗ ਜੁਗ ਰਹਿਣ ਮੇਰੇ ਵੀਰ ਵਸਦੇ ,ਬਾਬਲ ਦੇ ਖੇੜੇ ਦੀ ਹਾਂ ਸੁਖ ਮੰਗਦੀ ,

ਕਹੇ ਹਰਵਿੰਦਰ ਬਿਲਾਸ੍ਪੁਰੀਆ ,ਫਿਕਰਾਂ ਦੇ ਵਿਚ ਨਾ ਤੂ ਪੈ ਬਾਬਲਾ ,

ਧੀਆਂ ਨੂ ਬੁਲਾਵੇਂ ਕਿਹ ਕੇ ਮਰ ਜਾਣੀਆ,ਜਿਓਣ ਜੋਗੀਆਂ ਵੀ ਕਿਤੇ ਕਿਹ ਬਾਬਲਾ ...

ਪਿੰਡ ...ਹਰਵਿੰਦਰ ਧਾਲੀਵਾਲ

ਪਿੰਡ ...ਹਰਵਿੰਦਰ ਧਾਲੀਵਾਲ

ਸਹਿਰਾਂ ਦੇ ਨਾਲ ਜੁੜਗੀਆਂ ,ਹੁਣ ਤਾ ਤਾਰਾਂ ਪਿੰਡ ਦੀਆਂ ,

ਭੁਲਦੀਆਂ ਨਹੀ ਭੁਲਾਈਆਂ ,ਮੌਜ ਬਹਾਰਾਂ ਪਿੰਡ ਦੀਆਂ ...

ਦਾਖ ਮੁਨੱਕੀ ਲਾਲੀ ਹੁੰਦੀ, ਕਾਮਿਆਂ ਦੇ ਮੂੰਹਾਂ ਤੇ ,

ਸ਼ਰਬਤ ਵਰਗੇ ਪਾਣੀ ਮਿੱਠੇ ਡੂੰਘਿਆਂ ਖੂਹਾਂ ਦੇ ,
ਚਸ਼੍ਮੇ ਵਾਂਗੂ ਡੁੱਲੀ ਜਾਵਣ, ਧਾਰਾ ਟਿੰਡ ਦੀਆਂ ,
ਭੁਲਦੀਆ ਨਹੀ ਭੁਲਾਈਆਂ ਮੌਜ ਬਹਾਰਾਂ ਪਿੰਡ ਦੀਆਂ..

ਨਾਲੇ ਵੇਖੀ ਜਾਂਦੇ ਮਾਂ ਨੂੰ ,ਪੇੜੇ ਕਰਦੀ ਨੂੰ ,
ਬੁਰਕੀ ਦੇ ਨਾਲ ਮਸਾਂ ਰੋਕਦੇ, ਮੱਖਣੀ ਖਰਦੀ ਨੂੰ ,

ਚਿੜੀਆਂ ਦੀ ਚੀਂ ਚੀਂ ਤੇ, ਮੱਝਾਂ ਗਾਵਾਂ ਰਿੰਗਦੀਆਂ ,

ਭੁਲਦੀਆਂ ਨਹੀ ਭੁਲਾਈਆਂ ਮੌਜ ਬਹਾਰਾਂ ਪਿੰਡ ਦੀਆਂ ..

ਜਦੋਂ ਕਦੇ ਸੀ ਆਉਣਾ ਹੁੰਦਾ, ਭੂਆ ਫੁੱਫੜ ਨੇ ,
ਦੂਜੇ ਦਿਨ ਫਿਰ ਵਾਂਗ ਦਿੱਤੀ ਨਾ, ਕਦੇ ਵੀ ਕੁੱਕੜ ਨੇ ,
ਰੂੜੀ ਉਤੇ ਸੀ ਖੰਭਾਂ ਦੀਆਂ ਡਾਰਾਂ ਖਿੰਡਦੀਆਂ ,
ਭੁਲਦੀਆਂ ਨਹੀ ਭੁਲਾਈਆਂ ਮੌਜ ਬਹਾਰਾਂ ਪਿੰਡ ਦੀਆਂ ...

ਗੜ੍ਹਵੇ ਵਰਗੀ ਬਰਕਤ,, ਹੁਣ ਦੇ ਲੀਟਰ ਵਿਚ ਹੈ ਨੀ ,
ਨਿੱਘ੍ਹ ਖੇਸ ਦੀ ਬੁੱਕਲ ਵਰਗਾ, ਹੀਟਰ ਵਿਚ ਹੈ ਨੀ ,
ਹੁਣ ਹਰਵਿੰਦਰਾ ਰਹਿ ਗਈਆਂ ਨਾ ਸਾਰਾਂ ਬਿੰਦ ਦੀਆਂ ,

ਭੁਲਦੀਆਂ ਨਹੀ ਭੁਲਾਈਆਂ ਮੌਜ ਬਹਾਰਾਂ ਪਿੰਡ ਦੀਆਂ ..............ਹਰਵਿੰਦਰ ਧਾਲੀਵਾਲ

ਮਾਂ ਦਾ ਕਰਜ ਚੁਕਾਓ ਲੋਕੋ ,ਧੀ ਤੇ ਰੁਖ ਬਚਾਓ ਲੋਕੋ ,

ਜੋ ਪੈਦਾ ਕਰੇ ਤੇ ਪਾਲੇ ਸਾਨੂ ,ਖੋਫ਼ ਓਸ ਦਾ ਖਾਓ ਲੋਕੋ