Labels

Showing posts with label ਗਜ਼ਲਾਂ. Show all posts
Showing posts with label ਗਜ਼ਲਾਂ. Show all posts

Wednesday, 11 July 2012

ਗਜ਼ਲ

ਜਿਸਨੂੰ ਜੋ ਵੀ ਚਾਹਤ ਉਸਨੂੰ  ਉਹ ਚਾਹਤ ਮਿਲੇ 
ਸਾਨੂੰ ਤਾਂ ਬਸ ਔੜ ਮਾਰੀ ਰੁੱਤੇ ਉਸਦਾ ਖਤ ਮਿਲੇ 
.........
ਚੁੱਪ ਰਹਿਣ ਤੇ ਲੋਕਾਂ ਨੇ ਹੈ  ਭੰਡਣਾ ਪਾਣੀ ਪੀ ਪੀ 
ਕੁੱਝ ਬੋਲਾਂ ਤਾਂ ਬਲਦੇ ਸ਼ਬਦਾਂ ਦੀ ਬਗਾਵਤ ਮਿਲੇ 
.........
ਸੋਫੀ ਬੰਦਾ ਕੀ ਗੱਲ ਕਰਲੂ ਪਿਆਰ ਮੁਹੱਬਤ ਵਾਲੀ 
ਬਸ ਕੌੜਾ ਪਾਣੀ ਸੰਘੋਂ ਲਾਹ ਕੇ  ਹੋ ਮਦਮਸਤ ਮਿਲੇ 
.........
ਭੱਜੀਆਂ ਬਾਹਵਾਂ ਨੇ ਤਾਂ ਆਖਰ  ਗਲ ਨੂੰ ਆਉਣਾ 
ਧਾ  ਗਲਵੱਕੜੀ  ਪਾਈ  ਹੋ  ਕੇ  ਵੱਟੋ  ਵੱਟ  ਮਿਲੇ 
..........
ਸਾੜ ਸੁੱਟਿਆ ਪਿੰਡਾ  ਹਰਵਿੰਦਰ  ਗਰਮ ਹਵਾਵਾਂ 
ਵਿੱਚ ਤੰਦੂਰ  ਵੜ  ਵੇਖੀਏ  ਸ਼ਾਇਦ ਰਾਹਤ ਮਿਲੇ ........ਹਰਵਿੰਦਰ ਧਾਲੀਵਾਲ 

Sunday, 15 April 2012

ਗਜ਼ਲ

ਮੈਨੂੰ ਨਹੀਂ ਪਤਾ ਕਿ ਕਿੱਥੇ ਹੋਈ ਹੈ ਗੜਬੜ 
ਕਿ ਮੇਰੇ ਸਾਹੀਂ ਕਿਓਂ ਵਸ ਗਈ ਹੈ ਪੱਤਝੜ 
.....................................................
ਰੁੱਤਾਂ  ਨੂੰ  ਦੋਸ਼  ਦੇਈਏ  ਕਿ ਰੁੱਖਾਂ ਨੂੰ  ਯਾਰਾ 
ਜਿਸਨੂੰ ਵੀ ਕਹਿਏ ਉਹੀ ਜਾਂਦਾ ਹੈ ਬਲ ਸੜ 
......................................................
ਮੇਰੇ ਜਿਹਨ ਵਿੱਚ ਹੁਣ ਹੋਰ ਕੁਝ ਨਹੀਂ ਉੱਗਦਾ
ਬਸ ਹਵਾਵਾਂ ਦਾ ਸ਼ੋਰ ਹੈ ਤੇ ਪੱਤਿਆਂ ਦੀ ਖੜ ਖੜ 
........................................................
ਸਕੂਨ ਦੀ ਜਗਾਹ ਲੱਗ ਗਈ ਹੈ ਅੱਚਵੀ ਜਿਹੀ 
ਤੇਰੀ ਦੁਆ ਦਾ ਲੱਗਦੈ ਹੋਇਆ ਉਲਟ ਅਸਰ 
.........................................................
ਕਦੇ ਤੇਰੇ ਦਰ ਤੇ ਵੀ ਆਵਾਂਗੇ ਬਣ ਕੇ ਸਵਾਲੀ 
ਸਾਡੇ ਮੱਥੇ ਜੋ  ਲਿਖਿਐ  ਭਟਕਣਾ ਦਰ ਬ ਦਰ 
..........................................................
ਚੁੱਪ ਚੁੱਪ ਕਿਓਂ ਰਹਿੰਦਾ ਹਰਵਿੰਦਰ ਅੱਜ ਕੱਲ 
ਆਓ ਕੱਢੀਏ ਇਸ ਗੱਲ ਦੀ ਕੋਈ ਖੋਜ ਖਬਰ
..........................o.............................

Wednesday, 18 January 2012

ਗਜ਼ਲ

ਮੈਂ  ਵੇਖੇ ਨੇ ਜਿੰਦਗੀ ਵਿੱਚ  ਬੜੇ ਐਹੋ ਜਿਹੇ ਮੰਜ਼ਰ 
ਮੈਨੂੰ  ਵੇਖ ਕਿਓਂ  ਲੁਕੋ  ਰਿਹੈਂ ਹੱਥ  ਵਿਚਲਾ ਖੰਜਰ 


ਵੇਖੀਂ! ਕਿਤੇ ਪਿੱਠ ਤੇ ਵਾਰ ਕਰ ਗਦਾਰ ਬਣ ਜਾਵੇਂ 
ਆ ਹਿੱਕ ਤੇ ਵਾਰ ਕਰ ਲੈ ਜੇ ਅਖਵਾਉਣੈਂ ਬਹਾਦਰ 


ਚੁੱਲਿਆਂ ਦੀ ਅੱਗ ਬੁੱਝ ਗਈ ਤੇ ਸਿਵੇ ਨੇ ਬਲ ਰਹੇ 
ਤੇਰੀ ਫੂਕ ਨੇ ਹੈ ਕੀਤਾ ਕੁਝ ਇਸ ਤਰਾਂ ਦਾ ਅਸਰ 


ਉੱਡਦੀ ਬਦਲੋਟੀ ਨੂੰ  ਆਖੋ  ਕੁੱਝ ਬੂੰਦਾਂ ਸੁੱਟ ਜਾਵੇ 
ਬੜੇ ਚਿਰਾਂ ਤੋਂ  ਪਿਆਸੀ ਯਾਰੋ ਧਰਤੀ ਇਹ ਬੰਜਰ 


ਆਖਰ ਤਾਂ ਕਿਰਨ ਨੇ  ਚੀਰ  ਦੇਣੀ ਹੈ ਧੁੰਦ ਸੰਘਣੀ 
ਆਸ ਤਾਂ ਨਹੀਂ ਕਿ ਤੂੰ ਹੋਵੇਂਗਾ ਇਸ  ਗੱਲੋਂ ਬੇ ਖਬਰ 


ਗੈਰਾਂ ਸੀ ਜਦ ਪੁਛਿੱਆ ਕਿ  ਦੱਸ ਤੇਰਾ ਮੀਤ ਕਿਹੜਾ 
ਉਸ ਹੌਲੀ  ਦੇਣੇ ਕਹਿ ਦਿੱਤਾ ਧਾਲੀਵਾਲ ਹਰਵਿੰਦਰ .............ਹਰਵਿੰਦਰ ਧਾਲੀਵਾਲ 

Monday, 12 December 2011

ਗ਼ਜ਼ਲ

ਸੱਚੇ  ਸੁੱਚੇ  ਪਿਆਰ  ਗੁਆਚੇ 
ਫੁੱਲਾਂ  ਵਰਗੇ  ਯਾਰ ਗੁਆਚੇ 


ਦਮ ਦੇ ਵਿੱਚ ਜੋ ਦਮ ਸੀ ਭਰਦੇ 
ਸੱਜਣ ਬੜੇ ਦਮਦਾਰ ਗੁਆਚੇ 


ਲਾਈਏ ਕਿਸ ਨੂੰ ਨਾਲ ਹਿੱਕ ਦੇ 
ਸਾਡੇ ਗਲ  ਦੇ ਹਾਰ  ਗੁਆਚੇ 


ਕਿਸ ਤੋਂ ਮੰਗੀਏ ਮਾਫੀ ਯਾਰੋ 
ਮੁਰਸ਼ਦ ਬਖਸ਼ਣਹਾਰ ਗੁਆਚੇ 


ਹਾਸਿਆਂ ਚੋਂ ਗਮ ਲਭ ਲੈਂਦੇ ਸੀ 
ਰੱਬ ਵਰਗੇ ਗਮ ਖਾਰ ਗੁਆਚੇ 


ਤੇਰੀ ਲਾਸ਼  ਨੂੰ  ਕਿਸਨੇ ਢੋਣਾ 
ਹਰਵਿੰਦਰ ਮੋਢੇ ਚਾਰ ਗੁਆਚੇ ............ਹਰਵਿੰਦਰ ਧਾਲੀਵਾਲ 

Friday, 18 November 2011

ਗ਼ਜ਼ਲ

ਹਰ ਮਹਿਫਲ ਵਿੱਚ ਹਾਜਰੀਆਂ ਲਗਵਾਈ ਚੱਲ 
ਟੁੱਟੇ ਭੱਜੇ,ਵਿੰਗੇ ਟੇਢੇ,ਅੱਖਰ ਚਾਰ ਸੁਣਾਈ ਚੱਲ 


ਕਿਸੇ ਸ਼ਾਇਰ ਦੀ ਰਚਨਾ ਸੁਣਨ ਦੀ ਲੋੜ ਨਹੀਂ 
ਬਸ ਇੰਡ ਤੇ ਆਕੇ, ਤਾੜੀ ਖੂਬ  ਵਜਾਈ  ਚੱਲ 


ਖੱਟੀ ਚੱਲ ਵਾਹ ਵਾਹ, ਸ਼ੇਅਰ ਸੁਣਾ ਕੇ ਚੋਰੀ ਦੇ 
ਬੇ ਸ਼ਰ੍ਮੀ ਨਾਲ  ਬੁੱਲੀਆਂ ਵਿੱਚ ਮੁਸਕਾਈ ਚੱਲ 


ਨਜ਼ਮ, ਲੇਖ  ਵਿੱਚ  ਫਰਕ  ਜੇ ,ਤੈਨੂੰ ਲਭੇ  ਨਾ 
'ਸੋਹਣੀ ਰਚਨਾ' ਕਹਿ ਕੇ, ਡੰਗ  ਟਪਾਈ  ਚੱਲ 


ਬਣ  'ਸੰਪਾਦਕ'  ਓਨਲਾਈਨ  ਇੱਕ  ਪੇਪਰ ਦਾ 
ਕੱਚਾ ਪਿੱਲਾ ਜੋ ਵੀ ਹੋਵੇ,ਉਸਦੇ ਵਿੱਚ ਸਮਾਈ ਚੱਲ 


ਪਰਵਾਹ ਨਾ ਕਰ, ਕਿਸੇ ਨਾਢੂ ਖਾਂ ਹਰਵਿੰਦਰ ਦੀ      
ਤੂੰ,  ਤੋਰੀ  ਫੁਲਕਾ, ਚਲਦਾ ਜਿਵੇਂ,  ਚਲਾਈ  ਚੱਲ ......................ਹਰਵਿੰਦਰ ਧਾਲੀਵਾਲ 

Wednesday, 16 November 2011

ਗ਼ਜ਼ਲ

ਮਾਰ ਲਿਆ ਰੁੱਸਵਾਈਆਂ  ਨੇ 
ਤੇਰੀਆਂ ਬੇ ਪਰਵਾਹੀਆਂ  ਨੇ 


ਸਾਡੀ ਝੋਲੀ ਦੇ ਵਿੱਚ ਪਈਆਂ
ਲੰਮੀਆਂ ਬਹੁਤ ਜੁਦਾਈਆਂ ਨੇ 


ਤੇਰੇ  ਨਾਂ ਦਾ ਪੱਥਰ ਗੱਡਿਆ 
ਮਿਲ ਜੁਲ ਕੇ ਸਭ ਰਾਹੀਆਂ ਨੇ 


ਰੌਨਕ ਲੈ ਗਿਓਂ ਨਾਲ ਆਪਣੇ
ਜਿੰਦ ਘੇਰ ਲਈ ਤਨਹਾਈਆਂ ਨੇ 


ਡੌਰ ਭੌਰ ਜੀਆਂ ਝਾਕੀ ਜਾਵਣ 
ਸਧਰਾਂ ਹੁਣ  ਬੁਖ੍ਲਾਈਆਂ  ਨੇ 


ਨੈਣੀਂ  ਪਾ  ਯਾਦਾਂ ਦਾ  ਕਜਲਾ 
ਘਟਾ ਕਾਲੀਆਂ ਚੜ ਆਈਆਂ ਨੇ 


ਤੇਰੇ ਕੀ  ਸੀ ਵੱਸ  ਹਰਵਿੰਦਰਾ 
ਜਦ  ਤਾਰਾਂ ਧੁਰ ਤੋਂ ਆਈਆਂ ਨੇ ..............ਹਰਵਿੰਦਰ ਧਾਲੀਵਾਲ 

Wednesday, 9 November 2011

ਗ਼ਜ਼ਲ

ਸਦੀਆਂ  ਦੇ ਸੂਰਜ਼  ਯਾਰੋ ,ਅਸੀਂ ਪਿੰਡੇ ਉੱਤੇ ਸੇਕੇ ਨੇ 
ਮੈ ਸ਼ੂਕਦੇ ਦਰਿਆਵਾਂ ਦੇ ਵੀ  ,ਰੁੱਖ  ਬਦਲਦੇ ਵੇਖੇ ਨੇ  

ਘੱਟੋ  ਘੱਟ ਤੂੰ ਦਾਤੀ  ਵਾਲੇ ,ਦੰਦੇ  ਤਾਂ ਕਢਵਾ ਨਵੇਂ ,
ਚੋਰੀ ਛੁੱਪੇ ਦੁਸ਼ਮਣ ਨੇ ਤਾਂ ,ਚਾਕੂ  ਛੁਰੀਆਂ  ਰੇਤੇ ਨੇ 

ਹੁਣੇ ਹੁਣੇ ਨੇ ਬੈਠੀਆਂ ਆ ਕੇ, ਹਰੀ  ਕਚੂਰ ਡੇਕ ਉੱਤੇ 
ਬਾਜਾਂ ਦੀ ਵੀ ਬੂਥ ਲੁਆਤੀ,ਚਹੁੰ ਚਿੜੀਆਂ ਦੇ ਏਕੇ ਨੇ 

ਰੁਮ੍ਕਦੀਆਂ ਪੌਣਾਂ ਨੇ ਜਦ ,ਰੂਪ ਧਾਰਿਆ  ਝੱਖੜ ਦਾ 
ਸੰਗ ਉੱਡ ਕੇ  ਸਾਥ ਹੈ  ਦਿੱਤਾ ,ਮਾਰੂਥਲ  ਦੇ ਰੇਤੇ ਨੇ 

ਠੰਡੀਆਂ ਸ਼ੀਤ ਹਵਾਵਾਂ ਨੇ ,ਅੰਦਰ ਗਰਮ ਚੁਆਤੀ ਵੀ 
ਗਰਮ ਸੁਆਸਾਂ ਅੱਗੇ  ਠੰਡ ਨੇ ,ਗੋਡੇ  ਆਖਰ ਟੇਕੇ ਨੇ 

ਕਿਓਂ ਹਰਵਿੰਦਰ ਭੁੱਲ ਗਿਆ ਤੂੰ, ਦਸਤਕ ਦੇਣੀ ਬੂਹੇ ਤੇ 
ਸੌ ਸਾਲ ਸਾਨੂੰ  ਪਿਛੇ ਸੁੱਟ ਤਾ ,ਓਏ  ਤੇਰੇ ਮਾੜੇ ਚੇਤੇ ਨੇ ......................ਹਰਵਿੰਦਰ ਧਾਲੀਵਾਲ 

Tuesday, 8 November 2011

ਗ਼ਜ਼ਲ

ਹੈ ਨਹੀਂ ਕੋਈ ਹਿਸਾਬ ਹਾਕਮ ਦੇ ,ਝੂਠਾਂ ਅਤੇ ਫਰੇਬਾਂ ਦਾ 
ਸਾਨੂੰ ਤਾਂ ਬਸ ਪਤਾ ਹੈ ਯਾਰੋ  ,ਖਾਲੀ ਹੁੰਦੀਆਂ  ਜੇਬਾਂ ਦਾ 

ਵਿੱਚ  ਬਜ਼ਾਰੀਂ  ਜੇਰਾ ਕਰ ਕੇ ,ਆਇਆ ਕੰਮ  ਤੋਂ ਮੁੜਦਾ 
ਅੱਗੇ ਲੰਘ ਗਿਆ ਮੁੱਲ  ਪੁੱਛ ਕੇ ,ਬਿੱਲੂ  ਮਜਬੀ  ਸੇਬਾਂ ਦਾ 

ਬਘਿਆੜਾਂ ਨੇ ਖਿੱਚੀ ਰਲ ਕੇ ,ਹੈ ਲਛਮਣ  ਰੇਖਾ ਵਾੜੇ ਤੇ 
ਚਿਟਿਓਂ ਕਾਲਾ ਰੰਗ ਹੋ ਗਿਆ,ਖੜੀਆਂ ਖੜੀਆਂ ਭੇਡਾਂ ਦਾ 

ਕੁਝ ਨੋਟਾਂ ਦੇ ਬਦਲੇ ਰੁਲ੍ਣੀ ,ਫੇਰ ਇਜ਼ਤ ਹੈ ਕਿਰਤੀ ਦੀ 
ਹੁਣ  ਫੇਰ ਹੋਣਗੇ  ਰਾਜੀਨਾਮੇ ,ਤੇ ਮੁਢ   ਬਝਣਾ ਝੇਡਾਂ ਦਾ 

ਮਹਿਫਲ ਚੋਂ ਉਸਦੀ  ਯਾਰੋ ,ਪੱਲੇ  ਤਾਂ  ਕੁਝ  ਪਿਆ ਨਹੀਂ 
ਯਾਦ ਹੈ  ਬਸ ਸ਼ੋਰ ਸ਼ਰਾਬਾ ,ਤੇ ਥੱਪ-ਥ੍ਪਾਉਣਾ ਮੇਜਾਂ ਦਾ 

ਨੇਤਾ ਦੀ ਗਲਵਕੜੀ  ਨੂੰ ,ਦੱਸ ਰਿਹਾ ਉਹ ਹੁੱਬ,, ਹੁੱਬ ਕੇ
ਕੀ ਭੇਤ   ਹਰਵਿੰਦਰ  ਤਾਈਂ , ਵੋਟ ਰੁੱਤ  ਦੀਆਂ ਖੇਡਾਂ ਦਾ .........................ਹਰਵਿੰਦਰ ਧਾਲੀਵਾਲ 

Thursday, 3 November 2011

ਗ਼ਜ਼ਲ

ਆਓ ਸਾਰੇ ਸੁਪਨਾ ਹੋ  ਗਏ , ਸੁੱਖਾਂ  ਦੀ  ਗੱਲ  ਕਰੀਏ 
ਡੈਣ ਵਾਂਗਰਾਂ ਝਪਟਣ  ਵਾਲੇ, ਦੁੱਖਾਂ ਦੀ  ਗੱਲ  ਕਰੀਏ 

ਪਾਉਣ ਵਲੇਟੇ ਇੱਕ ਦੂਜੀ ਨੂੰ,ਆਂਦਰਾਂ ਉਸਦੀਆਂ ਖਾਲੀ 
ਕੁਰਬਲ ਕੁਰਬਲ ਕਰ ਰਹੀਆਂ, ਭੁੱਖਾਂ ਦੀ ਗੱਲ ਕਰੀਏ

ਜਨਤਾ ਤਾਂ ਹੈ ਗਊ  ਵਿਚਾਰੀ ,ਜਨਤਾ  ਨੇ ਕੀ ਕਹਿਣਾ 
ਲੀਡਰ,ਕਲਮਾਂ ਰਲ  ਬੈਠ ਕੇ, ਲੁੱਟਾਂ ਦੀ  ਗੱਲ  ਕਰੀਏ 

ਹਰੇ ਭਰੇ  ਸੀ  ਕਿਸੇ  ਸਮੇ  ਜੋ , ਗੂੜੀਆਂ  ਛਾਵਾਂ  ਦਿੰਦੇ 
ਮਹਿਲਾਂ ਦੇ ਦਰਵਾਜੇ  ਬਣ ਗਏ, ਰੁੱਖਾਂ ਦੀ ਗੱਲ ਕਰੀਏ 

ਵਰਿਆਂ ਦੀ ਗਿਣਤੀ ਵਿਚੋਂ ,ਨਹੀਂ ਲਭਣੇ 'ਅਧ' ਗੁਆਚੇ 
ਅੱਜ ਬੈਠੋ  ਮੇਰੇ ਕੋਲ  ਸਾਰੀਆਂ, ਰੁੱਤਾਂ ਦੀ ਗੱਲ ਕਰੀਏ 

ਦੁਧ  ਮਲਾਈਆਂ ਵਰਗੇ  ਚੇਹਰੇ, ਵੇਖੇ  ਬੜੇ ਹਰਵਿੰਦਰ 
ਆ, ਝੁਰ੍ੜੇ, ਘੋਰ ਉਦਾਸੇ  ਹੋਏ , ਮੁੱਖਾਂ ਦੀ  ਗੱਲ ਕਰੀਏ .....................ਹਰਵਿੰਦਰ ਧਾਲੀਵਾਲ 

Monday, 17 October 2011

ਗ਼ਜ਼ਲ

ਦਿਨ ਨੇ  ਦਿਓਆਂ ਵਰਗੇ ,ਇਥੇ  ਰਾਤਾਂ ਨੇ  ਰਾਖਸ਼ੀ ਯਾਰੋ 
ਹਾਲਾਤ ਜੇ ਇੱਦਾਂ ਹੀ ਰਹੇ,ਮੁਸ਼ਕਿਲ ਹੈ ਘਰ ਵਾਪਸੀ ਯਾਰੋ 

ਅਬਲਾ ਦੀ ਹਰ ਚੀਖ ਦਾ ,ਰਿਸ਼ਤਿਆਂ ਦੇ ਹੋਏ ਘਾਣ ਦਾ 
ਹਰ ਸੂਰਜ ਗਵਾਹ ਹੈ  ,ਹਰ ਚੰਨ ਵੀ ਹੈ  ਸਾਖਸ਼ੀ ਯਾਰੋ 

ਚੋਟੀ ਦੇ ਇੱਕ ਨੇਤਾ ਨੇ ,ਕੱਟੀ ਹੈ ਰਾਤ ਦਲਿਤ ਦੇ ਘਰ 
ਮੈਨੂੰ ਤਾਂ ਹੈ ਇਹ ਜਾਪਦੀ ,ਘਟਨਾ ਕੋਈ ਨਾਟਕੀ ਯਾਰੋ 

ਮਹੱਲਾਂ ਤੇ ਦੀਪ ਮਾਲਾ ਕਰ ,ਮੁੜਿਆ ਉਹ ਜਦ ਘਰ ਨੂੰ 
ਵੇਖ ਕੇ ਦੰਗ ਰਹਿ ਗਿਆ,ਆਪਣੇ ਘਰ ਦੀ ਸਾਦਗੀ ਯਾਰੋ 

ਗੱਲਾਂ ਕਰਦਾ ਕਰਦਾ ਹੀ ,ਚੁੱਪ ਹੋ ਗਿਆ ਹਰਵਿੰਦਰ 
ਜੋ ਆਇਆ ਨਹੀਂ ਜੁਬਾਂ ਤੇ ,ਖਬਰੇ ਉਹ ਰਾਜ਼ ਕੀ ਯਾਰੋ ...........ਹਰਵਿੰਦਰ ਧਾਲੀਵਾਲ 

Sunday, 25 September 2011

ਗ਼ਜ਼ਲ

ਐਤਕੀਂ ਦੇ ਮੁਸ਼ਾਇਰੇ , ਤਰੰਨਮ ਚ ਗਾਵਾਂਗੇ ਗ਼ਜ਼ਲ 
ਅਜੇ ਪੂਰੀ ਹੋ ਲੈਣ ਦੇ ਯਾਰ ,ਫੇਰ ਸੁਣਾਵਾਂਗੇ  ਗ਼ਜ਼ਲ 

ਗਜ਼ਲਾਂ ਵਰਗੀਆਂ ਤਾਂ ਮੁੱਕੀਆਂ  ,ਮਾਵਾਂ ਦੇ ਕੁਖੀਂ
ਰੋ ਰਹੀ ਕਾਇਨਾਤ ਹੈ ,ਕਿਵੇਂ ਹਾਸਾਵਾਂਗੇ ਗ਼ਜ਼ਲ 

ਨਸ਼ੇ ਵਿੱਚ ਧੁੱਤ ਹੋ ,ਬਣਾ ਰਹੇ ਸਕੀਮ ਇਸ ਤਰਾਂ 
ਮਾਰ ਗੋਲੀ ਦਿਨ ਦਿਹਾੜੇ , ਉਡਾਵਾਂਗੇ  ਗ਼ਜ਼ਲ 

ਗਰੀਬੂ ਦੇ ਘਰ ਚਲਾਂਗੇ ,ਆਥਣੇ ਜੇ ਸਾਇਕਲ ਤੇ 
ਓਥੇ ਡੋਲੂ ਦੀ ਤਾਲ ਤੇ  ,ਬੈਠ ਗੁਣਗੁਣਾਵਾਂਗੇ ਗ਼ਜ਼ਲ 

ਆਖਰੀ ਸ਼ੇਅਰ ਗ਼ਜ਼ਲ ਦਾ ,ਹਰਵਿੰਦਰ ਲਿਖ ਰਿਹੈ
ਜਦੋਂ ਵੀ ਲਿਖ ਦਿੱਤਾ, ਸ਼ੀਸੇ ਚ ਜ੍ਡਾਵਾਂਗੇ ਗ਼ਜ਼ਲ .....................ਹਰਵਿੰਦਰ ਧਾਲੀਵਾਲ 





Friday, 23 September 2011

ਗ਼ਜ਼ਲ

  ਤੇਰੇ ਤੋਂ ਬਿਨ ਸਜਣ ਜੀ , ਸਾਡਾ ਕੋਈ ਸਹਾਰਾ ਨਹੀ .
ਵਿਛੜ ਕੇ ਤੈਥੋਂ ਸੋਹਣਿਆ ,ਸਾਡਾ ਹੋਣਾ ਗੁਜ਼ਾਰਾ ਨਹੀ .

ਵਾਰ ਦੇਣੀ ਸੀ ਜਾਨ ਮੈ , ਤੂੰ  ਅਜਮਾਉਂਦਾ ਤਾਂ  ਸਹੀ ,
ਪਰ ਤੇਰੇ ਵਲੋਂ ਰਹਿਬਰਾ ,ਕਦੇ ਹੋਇਆ ਇਸ਼ਾਰਾ ਨਹੀ .

ਥੱਲੇ ਨੂੰ  ਹੱਥ ਲਾ  ਲਿਐ, ਕੁਲੰਜ  ਲਿਆ  ਹੈ  ਸਾਗਰ ,
ਘਰ ਆਉਣ ਦੀ ਸੋਚਦਾਂ ,ਪਰ ਦਿਸਦਾ ਕਿਨਾਰਾ ਨਹੀ .

ਲਿਖੀ ਜਾਣਗੇ ਕਾਗਜ ਤੇ ,ਉਹ  ਊਲ ਜਲੂਲ ਊਂ ਤਾਂ ,
 ਹਾਹਾ ਰਾਰਾ ਵਾਵੇ ਸਿਹਾਰੀ,ਟਿੱਪੀ ਦੱਦਾ ਰਾਰਾ ਨਹੀ.

ਉਨ੍ਨਾ ਦੀ  ਬੇਰੁਖੀ ਦਾ ,ਆਲਮ  ਹੈ  ਇਹ  ਹਰਵਿੰਦਰ 
ਭਿੱਜੀ ਜਾਣਗੇ,ਪਰ ਛਤਰੀ ਥੱਲੇ,ਆਉਣਾ ਗਵਾਰਾ ਨਹੀ .........ਹਰਵਿੰਦਰ ਧਾਲੀਵਾਲ  

Saturday, 3 September 2011

ਗ਼ਜ਼ਲ

ਬੋਲਣ ਲਗਿਆਂ ਬੋਲ ਲਰ੍ਜਦੇ,ਤੂੰ ਚੰਗਾ ਨਹੀਂ ਕੀਤਾ .
ਨਾਲ ਕਰਕੇ ਗਦਾਰੀ ਫਰਜ਼ ਦੇ ,ਤੂੰ ਚੰਗਾ ਨਹੀਂ ਕੀਤਾ


ਚੰਗਾ ਤਾਂ ਇਹੀ ਸੀ ਕੇ ,ਤੂੰ ਵਰਤਦਾ ਸਾਡੇ ਨਾਲ ,
ਸਾਨੂ ਹੀ ਯਾਰਾ ਵਰਤ ਕੇ,ਤੂੰ ਚੰਗਾ ਨਹੀਂ ਕੀਤਾ .

ਦਾਦ ਦੇਣੀ ਬਣਦੀ ਸੀ,ਸਾਡੀ ਤਰਕਸ਼ੀਲਤਾ ਦੀ ਤੈਨੂ,
ਮਖੋਲ ਉਡਾ ਸਾਡੇ ਤਰਕ ਦੇ ,ਤੂੰ ਚੰਗਾ ਨਹੀਂ ਕੀਤਾ .


ਲੀਡਰ ਦੀ ਆਮਦ ਤੇ ,ਤੂੰ ਸ਼ਹਿਰ ਚ ਪਾਣੀ ਛਿੜਕਿਆ ,
ਪਾਣੀ ਤਾਂ ਲੋਕ ਪੀਣ ਨੂੰ ਤਰਸਦੇ ,ਤੂੰ ਚੰਗਾ ਨਹੀਂ ਕੀਤਾ .

ਪੇਟੋਂ ਭੁੱਖੇ ਆਂ ਅਸੀਂ ,ਗੁਰਬਤ ਦੇ ਮਾਰੇ ਆਂ,
ਮੈਖਾਨੇ ਖੋਲ ਵਿਦੇਸ਼ੀ ਤਰਜ਼ ਤੇ,ਤੂੰ ਚੰਗਾ ਨਹੀਂ ਕੀਤਾ .

ਹਰਵਿੰਦਰ ਨੇ ਮੰਗਣਾ ਇਕ ਦਿਨ ,ਹਿਸਾਬ ਪੂਰੇ ਦਾ ਪੂਰਾ ,
ਉਸਦੇ ਹਿੱਸੇ ਦਾ ਖਰਚ ਕੇ ,ਤੂੰ ਚੰਗਾ ਨਹੀਂ ਕੀਤਾ ....................ਹਰਵਿੰਦਰ ਧਾਲੀਵਾਲ 



Saturday, 20 August 2011

ਗ਼ਜ਼ਲ

ਮੋਤ ਨਾਲੋਂ ਵੀ ਭੈੜਾ ਹੁੰਦਾ ,ਦਰਦ ਜੁਦਾਈਆਂ ਦਾ ,
ਕੀ ਪੁਛਦੇ ਹੋ ਸਾਡਾ ਮੰਦਾ ,ਹਾਲ ਸੁਦਾਈਆਂ ਦਾ .

ਥਾਨੇਦਾਰ ਦੀ ਮੁੱਠੀ ਪਹਿਲਾਂ,ਕਰ ਦਿਓ ਗਰਮ ਤੁਸੀਂ,
ਡਰ ਨਈ ਰਹਿੰਦਾ ਫੇਰ, ਚੋੱਕ ਵਿਚ ਖੜੇ ਸਿਪਾਹੀਆਂ ਦਾ.

ਸਰਕਾਰੀ ਨੋਕਰ ਹਾਂ ਜੀ ,ਪੇਮੇਂਟ ਗੋਰ੍ਮੇੰਟ ਨੇ ਕਰਨੀ ,
ਡੂਹਡਾ ਬਿਲ ਬਣਾਓ ਮਾਲਕੋ ,ਇੰਨਾ ਦਵਾਈਆਂ ਦਾ.

ਜੇ ਤੂੰ ਹੀ ਖਾਹਿਸ਼ ਰੱਖੀ,  ਦਿਲ ਵਿਚ ਰੁੱਤ ਬਸੰਤੀ ਦੀ ,
ਕਰੂ ਸਵਾਗਤ ਫੇਰ ਕੋਣ ਦੱਸ ,ਰੁੱਤਾਂ ਅਣਚਾਹੀਆਂ ਦਾ.

ਮਸਤੀ ਦੇ ਵਿਚ ਰਹਿਣਾ ਸਿਖ ਲੈ ,ਤੂੰ ਹਰਵਿੰਦਰ ਸਿੰਘਾ ,
ਨੋਟਿਸ ਲੈਣਾ ਛਡ ਪਰਾਂ, ਹੁਣ ਬੇ-ਵਫਾਈਆਂ ਦਾ.

Tuesday, 9 August 2011

ਗ਼ਜ਼ਲ -ਸਮਰਪਿਤ ਪਰਮ ਸੰਤ ਬਾਬਾ ਰਾਮ ਸਿੰਘ ਜੀ

 ਆਪਣੇ ਦੁੱਖ ਲਈ ਰੋਣਾ ਯਾਰੋ ,ਇਹ ਕਿਥੋ ਦੀ ਸਿਆਣਪ ਹੈ ,
 ਦੁੱਖ ਪਰਾਏ ਰੋਈਏ ਜੇਕਰ ,ਬਣ ਜਾਏ ਫੇਰ ਇਬਾਦਤ ਹੈ .

ਤੈ ਕੀ ਦਰਦ ਨਾ ਆਇਆ ਰੱਬਾ ,ਦੁਨੀਆ ਪਈ ਕੁਰਲਾਵੇ ,
ਆਓ ਓਹਨੂ ਨਿਹੋਰੇ ਦੇਈਏ, ਉਹ ਦੁਨੀਆ ਦਾ ਮਾਲਿਕ ਹੈ .

ਇਕੋ ਦਰ ਦਾ ਮੰਗਤਾ ਬਣ ਜਾ ,ਪੈ ਜਾਊ ਤੈਨੂ ਖੈਰ ਕਦੇ ,
ਦੋ ਬੇੜੀਆਂ ਵਿਚ ਪੈਰ ਨਾ ਧਰੀਏ, ਸਿਆਨਿਆ ਦੀ ਕਹਾਵਤ ਹੈ .

ਸੇਵਾਦਾਰੋ ਵੇ ਸਰਦਾਰੋ , ਅੱਜ ਮੈ ਤੱਤੜੀ ਨੂੰ ਰੋਕਿਓ ਨਾ ,
ਰੱਜ ਰੱਜ ਉਸਦੇ ਦਰਸ਼ਨ ਕਰਲਾਂ ,ਮੇਰੇ ਦਿਲ ਦੀ ਚਾਹਤ ਹੈ .

ਉਹ ਤਾਂ ਰਹਿਮਤ ਯਾਰ ਓਹਦੇ ਦੀ ,ਗਲ ਨਾਲ ਲਾਈ ਬੈਠਾ ਹੈ .
ਹਰਵਿੰਦਰ ਐਵੇਂ ਸ਼ੱਕਾਂ ਕਰਦੈ, ਉਹ ਕਿਧਰ੍ਲਾ ਆਸ਼ਕ ਹੈ ..................ਹਰਵਿੰਦਰ ਧਾਲੀਵਾਲ .

Wednesday, 3 August 2011

ਗ਼ਜ਼ਲ

 ਖਬਰਦਾਰ ਹੋਸਿਆਰ ਅਗੇ ਆਪਣਿਆ ਦੀ ਬਸਤੀ ਏ ,
  ਆਪਣਿਆ ਤੋ ਬਚ ਜਾਵੀਂ ,ਗੈਰਾਂ ਦੀ ਕੀ ਹਸਤੀ ਏ .

ਦਸਾਂ ਨੋਹਾਂ ਦੀ ਕਿਰਤ ਛੱਡ ਕੇ ਹੋ ਜਾ ਠੱਗੀਆਂ ਮਾਰਨ ਤੇ ,
ਜੇ ਤੂੰ ਸਜਣਾ ਦੁਨੀਆ ਉਤੇ, ਚਾਹੁਨਾ ਸੋਹਰਤ ਸਸਤੀ ਏ .

ਮਾੜੇ ਬੰਦੇ ਦੀ ਇਕੋ ਘੁਰਕੀ ,ਫੂਕ ਅਸਾਂ ਦੀ ਕਢ ਦਿੱਤੀ ,
ਮਰ ਜਾਣਾ ਮੈ ਤੇਰੇ ਨਾਂ ਦੀ ,ਜੇਬ ਚ ਪਾ ਕੇ ਪਰਚੀ ਏ,

ਇਕ ਦੂਜੇ ਦੀ ਖੁਸ਼ੀ ਵੇਖ ਕੇ,ਲੋਕੀ ਸੜ-ਬਲ  ਜਾਂਦੇ ਨੇ ,
ਘੋਰ ਸਵਾਰਥ ਪਾਲੀ ਬੈਠੀ, ਤਾਹਿਓਂ ਦੁਨੀਆ ਗਰਕੀ ਏ .

ਚੋਰ ਅਖ ਨਾਲ ਵੇਖੇ ਉਹ ਹੁਸਨ ਦੀਆਂ ਸਰਕਾਰਾਂ ਨੂੰ ,
ਉਪਰੋਂ ਭੋਲਾ ਭਾਲਾ ਬਣਦਾ,ਵਿਚੋਂ ਪੂਰਾ ਠਰਕੀ ਏ ,

ਫੋਨ ਹਰਵਿੰਦਰ ਚੁਕਦਾ ਨਾਂਹੀ ,ਤੇ ਨਾ ਹੀ  ਉਹ ਹਰਕਾਰਾ ,
ਦਰਦੇ-ਦਿਲ ਰੁੱਕੇ ਵਿਚ ਲਿਖ ਕੇ ,ਜਿਦੇ ਹਥ ਭੇਜਿਆ ਦਸਤੀ ਏ ........ਹਰਵਿੰਦਰ ਧਾਲੀਵਾਲ .

Monday, 1 August 2011

ਗ਼ਜ਼ਲ

ਮਾੜੇ ਬੋਲ ਬੇਗਾਨਿਆ ਦੇ ,ਦਿਲ ਅਸਾਂ ਦਾ ਸਹ ਜਾਂਦੈ.
ਅਪਣਿਆ ਦਾ ਚੁਪ ਰਹਿਣਾ ਵੀ ,ਛੁਰੀਆਂ ਵਾਂਗੂ ਲਿਹ ਜਾਂਦੈ.

ਸਤਕਾਰ ਕਿਸੇ ਦਾ ਰੱਬ ਦੇ ਵਾਂਗੂ ,ਜੇਕਰ ਕਰ ਲਈਏ,
ਭੁਲ ਤਹਜੀਬਾ,ਬੰਦਾ ਖੁਦ ਨੂੰ ,ਰੱਬ ਸਮਝ ਕੇ ਬਿਹ ਜਾਂਦੈ.

ਸੱਚੇ ਦਾ ਅਪਮਾਨ ਕਰੋ ਤੇ ,ਮਾੜੇ ਦਾ ਗੁਣਗਾਨ ਕਰੋ ,
ਜੀਹਦੇ ਕੋਲੇ ਇਹ ਗੁਣ ਨੇ ਉਹੀ ਬਾਜ਼ੀ ਲੈ ਜਾਂਦੈ.


ਅਜਬ ਹੀ ਗੋਰਖ ਧੰਦਾ ਹੈ ਇਹ ਬਾਜ਼ੀ ਇਸ਼ਕੇ ਦੀ ,
ਜਰਬ ਤ੍ਕ੍ਸ਼ੀਮਾ ਕਰ ਵੇਖਿਆ ਪੱਲੇ ਕੁਝ ਨਾ ਰਿਹ ਜਾਂਦੈ.

ਮਾੜਾ ਬੰਦਾ ਗੁੱਸਾ ਨੱਕ ਤੇ, ਸਦਾ ਟਿਕਾਈ ਰੱਖਦਾ ਏ ,
ਬਚ ਜਾਈ ਹਰਵਿੰਦਰ ਕੋਲੋ ,ਛੇਤੀ ਗਲ ਨੂੰ ਪੈ ਜਾਂਦੈ............ਹਰਵਿੰਦਰ ਧਾਲੀਵਾਲ


ਗ਼ਜ਼ਲ

ਦੁੱਖ  ਦਸੀਏ  ਕੀਕਣ  ਹੋਰਾਂ   ਨੂੰ ,
ਕਿਵੇ ਗਲ ਨਾਲ ਲਾਈਏ ਥੋਹਰਾਂ ਨੂੰ ,

ਕਦੇ ਸਾਡੇ ਵਿਹੜੇ ਵੀ ਆਵਣ,
ਕੋਈ ਆਖੋ ਜਾ ਗੁਲਮੋਹਰਾਂ ਨੂੰ .

ਝਾਉਲਾ ਜਿਹਾ ਪੈਂਦਾ  ਸੱਜਣਾ ਦਾ ,
ਅਸੀਂ ਦੂਰੋ ਪਛਾਨੀਏ ਤੋਰਾਂ ਨੂੰ .

ਉਹ ਮਿਲ ਕੇ ਮੈਚ ਨੂ ਖੇਡ ਗਏ,
ਅਸੀਂ ਗਿਣਦੇ ਰਹੇ ਸਕੋਰਾਂ ਨੂੰ .

ਜਿੱਤਾਂ ਤੇ ਹਾਰਾਂ ਭਾਰੂ ਨੇ ,
ਦੱਸ ਕਿੰਝ ਅਜਮਾਈਏ ਜੋਰਾਂ ਨੂੰ ,

ਹੱਕ ਦੇਈਏ ਜਿੰਦਗੀ ਦਾ ਕਿਸ ਨੂੰ
ਹਰਵਿੰਦਰ ਨੂੰ ਜਾਂ ਹੋਰਾਂ ਨੂੰ .............................ਹਰਵਿੰਦਰ ਧਾਲੀਵਾਲ